لغز الغرفه المغلقه قصه حقيقيه
القصه التاليه حدثت بالقاهره بأحد الأحياء الشعبيه ::::
من عشر سنين جدتي توفت ،، ولأن والدتي هي الكبيره وسط أخواتها فكان لازم أن جدي يعيش معاها ..
والدتي طلبت منه كتير انه يعيش معانا لان مينفش يعيش لوحده ....
وبالفعل وافق في النهايه انه يعيش معانا بس قبل ما يوافق كان عنده شرطين في منتهي الغرابه ....
الأول وهو ان محدش فينا انا ووالدتي واختي يدخل الغرفه الخاصه بيه !!!! أياً كانت الأسباب !!
كان شرط غريب شويه لدرجة أن ماما لما سألته عن السبب جاوبها برد قاطع ،،،
محدش يدخل الغرفه بتاعتي لأي سبب !!! ودا شرطي الأول عشان اعيش معاكم ؟!!
أما الشرط الثاني فهو ان محدش يخبط علي غرفتي بعد الساعه ١٢ ليلاً مهما كانت الأسباب ...
دول الشرطين اللي عندي لو موافقه اعيش معاكم يبقي هتوافقوا عليهم .. مش موافقه يبقي اعيش في بيتي زي مانا وخلاص .
وخليني اقولك انها كانت مستغربه لان والدها اساسا مش غني مثلا ولا خايف علي فلوس انها تتسرق ! هو عايش علي المعاش اللي بياخده
وقراءة الكتب !!! ؟؟ ماما كانت دايماً بتحكي ان جدي مدمن شراء كتب وخصوصاً الكتب القديمه !!
في النهايه وافقت والدتي علي الشروط الغريبه دي ..
وعاش معانا جدي.. وسط تأكيد بتنفيذ شروطه الغريبه !!
حتي نظافة الغرفه هو اللي كان بينضفها
الغرفه دي ممنوع حد يدخلها ..... سواء كان جدي موجود في البيت او حتي او خرج
وطبعاً كان بيقفلها بالمفتاح وبالقفل .....
لكن طبعاً انا كنت من جوايا هموت واعرف الغرفه دي فيها إيه ! حاولت كتير اني بس ابص بصه علي الغرفه ولكن كان دايماً جدي يتكلم والباب مقفول او يطفي النور ويخرج يتكلم معانا
ومرت شهور علي الحال دا ... وابتدي الفضول يزيد جوايا ... اني اكتشف ايه اللي في الغرفه
ولاحظت ان جدي قليل الخروج من البيت جداً بس لازم يخرج يوم 5 من كل شهر عشان يقبض المعاش بتاعه .....
كنت منتظر الفرصه انها تيجي ! فرصة انه يخرج مثلاً وينسي الباب مفتوح !؟
بس كان جدي في منتهي الحرص انه يقفل الباب بالمفتاح ؟ لدرجة انه لما كان بيدخل التواليت كان بيقفل باب الغرفه بتاعته بالمفتاح والقفل !!!!
الشيء الغريب هو ان من يوم ما جدي تواجد معانا في الشقه وابتدينا نحس ان في شيء غريب
يعني مثلاً ماما تدخل المطبخ تلاقي برطمانات التوابل مفتوحه وواقعه علي الارض ..
مره تانيه تكون بتعمل سمك مثلا وتسيبه في الحله علي النار وبعد شويه تدخل تلاقي السمك واقع علي الارض والبوتجاز مطفي ؟؟؟
أبتدت الحوادث الغريبه تزيد .. هناء أختي اللي في الصف الثاني الثانوي ابتدت تشوف كوابيس
وكتير كنا بنصحي علي صوتها وهي بتصرخ
ولما ماما كانت بتسألها عن الكابوس اللي شافته كانت هناء بتحاوب بإجابات غريبه ...
انها شايفه باب غرفة جدو مفتوح ونيران طالعه منه وكانها جهنم ... وان جدو .. واقف وسط النيران دي وطالعله قرنين حجمهم كبير جداً وواقف بيضحك !!!!!!!
اما بالنسبالي انا فكنت ملاحظ ظلال !
ايوه ظلال سودا غريبه بحس بيها بتبص عليا !
مكنتش بحاول اركز كتير في اللي بيحصل
لحد ما في يوم كنت باخد حمام ...... وافتكرت اني نسيت الفوطه ..... فندهت علي ماما ... انها تجيبهالي..
وفعلا باب الحمام اتفتح ...
بس مافيش صوت .....
مديت ايدي من جنب ستارة الحمام وانا بقولها هاتي ياماما الفوطه ..
وفعلا لاقيت الفوطه بتظهر من جنب الستاره
استغربت ان ماما ساكته ... حركت راسي براحه جدا عشان ابص عليها
لاقيت من باب الحمام الفوطه موجوده بس اللي مسكها ايد سودا بأظافر طويله لونها ازرق!!
ومن الصدمه صرخت زي المجنون وانا مس مصدق اللي شوفته
بعد لحظات كانت الفوطه بتقع علي الارض ... والايد دي بتنسحب بره الباب وتختفي
لبست هدومي وانا بترعش ومش قادر اقف علي رجلي من الخوف .....
وخرجت وانا بتلفت حواليا !!! الساعه كانت ٣ العصر !!! واساسا ماما بترجع من الشغل الساعه ٤
واختي بتاخد دروس في الوقت دا
مافيش في الشقه غيري انا وجدو وبس
خبطت علي باب غرفة جدو ..... يا جدو جدو انت هنا !!!!
بس مكنش في حد بيرد عليا
طب هو جوا الغرفه ولا برا ؟؟؟؟!
يا جدو !!!! انت موجود !!!!
انا متعود ان جدو سمعه قوي جدا لدرجة انه بيسمع كل شيء حتي ولو بصوت واطي
نسيت اقولك انه كان احيانا يقول اللي كنا بنعمله او بنتكلم فيه حتي ولو مكنش موجود معانا أصلاً ...
دخلت غرفتي وانا مش مصدق اللي حصل
لسه بترعش من المنظر اللي شوفته .....
ووسط تفكيري في اللي حصل دا ...
سمعت صوت باب بيتفتح .... خرجت بره وانا فاكر ان ماما او جدو رجعوا البيت ....
بس كنت قدام مفاجأه .. باب غرفة جدو مفتوح
وبشكل غريب كان في ضوء أحمر خارج منها
وهنا افتكرت الحلم اللي كانت اختي بتحلمه وحكته ليا ولماما ........ بس الحقيقه مركزتش في اي شيء غير اني ادخل غرفة جدو
ووسط خوف وفضول وتردد ....
دخلت ....
الضوء الاحمر دا من لمبات متعلقه في السقف !! معتقدش كان عندنا ابداً لمبات لونها احمر قبل ما جدو ييجي يعيش معانا ....
علي الحوائط كانت الرفوف مليانه كتب ومجلدات ضخمه جداً .... وجنب الرفوف دي كان في دولاب خشب ، جدو جابه معاه من شقته ....
فتحت الدولاب وانا مرعوب بجد ..... ولما فتحته كنت قدام كارثه حقيقيه ......
قدامي كانت في رؤوس لحيوانات ...... جمجمه قرد علي ما اعتقد ،،، وجماجم لحيوانات زي الجمل او الماعز ...... واكتر عدد كان جماجم الماعز .. وكانت ملونه .. وعليها كتابات غريبه
قفلت الضلفه دي وانا قلبي هيتوقف من الخوف
معقوله جدو بيتعامل في السحر ؟؟؟ معقوله
ولما فتحت الضلفه التانيه .... كان قدامي شيء مفزع ،،،،، انا فاكر شكل تيته الله يرحمها كويس
اللي قدامي كانت رأس تيته بداخل إناء زجاجي مليان ماده غريبه ...... ماده لزجه وكثيفه جداً
خلاص كفايه انا لازم اخرج من هنا واحكي لماما كل شيء .......
وغصب عني وانا بحرك ايدي ... الاناء الزجاجي اتحرك من مكانه ..... ووقع علي الارض واتكسر
اتكسر والماده اللزجه دي غرقت الارض
اما رأس تيته !!!!!!! انا عارف انك مش هتصدقني
بس لما ركزت لاقيت راس تيته كلها قطع زجاج مغروسه فيها ...... والدماء بتسيل من رأسها
وبشكل غير طبيعي ومستحيل يحصل
الرأس فتحت عينيها
فتحت عينيها وكانت بتشهق .... بتشهق وكأنها مش عارفه تتنفس .....
هنا كان كفايه عليا قوي اللي شوفته ....
وخرجت برا الاوضه زي المجنون ...
صوت دوشه برا باب الشقه ....
فتحت الباب وانا بجري من الرعب
ولاقيت اهل المنطقه شايلين جدو والدم مغرق وجهه تماماً ..
وبيدخلوه من الباب ....
ربنا يجازي ولاد الحرام ،، واحد خبطه بعربيه
واتصلنا بالاسعاف وهييجوا ياخدوه ......
جدو كان شبه فاقد الوعي والناس بيدخلوه الصالون .. كان بيشاور علي غرفته !!!! عاوز يدخل هناك ...
دماءه بتسيل علي الارض .. ورأسه نفسها مرشق فيها الزجاج ..!!!!!!!!!!!! نفس اللي حصل من شويه في غرفته مع رأس تيته !!!!!!!!!!
ووسط زحمة الجيران .... كانت ماما وصلت ولما شافت المنظر كانت بتصرخ وهي بتترمي علي جدو ......
اما جدو فكانت عينيه عليا وعلي الغرفه !!!!!!!
كنت خايف من نظراته فعلاً .. خرجت وسط كل الناس الموجودين ............ وكانت غرفة جدو مقفوله !!!!! مقفوله بالقفل !!!!!!!!!!!
بعد دقايق وقبل وصول الاسعاف كان جدو مات
بعد اسبوع من الوفاه قررنا ندخل غرفة جدو ،،، وكسرنا القفل ........
احتمال متصدقنيش .... بس الغرفه كانت فاضيه؟؟؟؟؟؟
مافيش فيها غير سرير ... وبعض الملابس معلقه علي الشماعه وبس ...
مافيش دولاب ،، ومافيش كتب ....... !!!!!!!
انا محكتش حد اي شيء لان محدش هيصدقني ولولا ثقتي في حضرتك وانك هتصدقني فانا بحكيلك ......
بعد شهر علي وفاة جدو ابتدينا كلنا نحلم باحلام غريبه ،،،
اللي بيظهر فيها هو جدو .... بيظهرلنا انه بيتعذب واحيانا النيران ماسكه فيه
واحيانا كان بيظهر وهو مغطي بماده غريبه لزجه ولونها غريب ..... ومش عارف يتنفس
الاحلام زادت وابتدي جدو يقول كلمة انه راجع
وانه معانا .....
كنا بنشغل قرءان باستمرار ..
وللأسف الشديد مينفعش نسيب شقتنا لانها ايجار ومعندناش امكانيه نروح مكان تاني ....
الاحلام توقفت ..... ولكن ابتدت كارثه جديده تحصل
من الحوائط كان بيتسرب سائل غريب جداً
سائل لزج ورائحته غريبه ......
والله يا دكتور السائل دا كان بينزل لدرجة انه بيغرق الارض ...
ومش عارفين مصدره ايه !!!!
احنا في اخر دور ومافيش حد جنبنا ؟؟؟؟؟؟؟
السائل دا يا دكتور هو نفس السائل اللي انا شوفت رأس تيته جواه !! ونفس اللي كلنا في البيت شوفنا جدو متغرق بيه ......
انا باعت لحضرتك فيديو بخروج السائل دا من الحائط ....
وللعلم هو مش صرف صحي لان مافيش مواسير في الجنب دا اصلا
ولا هو شيء واقع من السقف لان دا اساسا بيخرج من وسط السقف زي ما هتشوف في الفيديو ... ولما حفرت في الحيطه ملقتش مصدر للسائل دا !!!!!! كل اللي لقيته حشرات غريبه وطارت لما حفرت ...
السائل دا حاليا بينزل في غرفتين من اماكن مختلفه ومش عارفين نتصرف ازاي بجد
احنا مرعوبين وخايفين ...... ومش فاهمين اي شيء
وانا مش قادر احكي لماما اللي حصل عشان متخافش اكتر .....
شوف الفيديوهات والصور يا دكتور وقولي رأيك
ويارب يكون عند حضرتك حل للمشكله دي
-----------------------------------
الفيديو المرفق حقيقي .....
ياتري عند حضراتكم أي تفسير منطقي ؟؟؟
----------------------
تواجدت هناك بنفسي وتم أخذ عينه من المادة الغريبه ،،،، وبعد فحصها من قبل متخصصين كانت النتيجه المذهله
المادة هي نوع من الاكتوبلازم!!! والذي كان يظهر قديماً في جلسات تحضير الأرواح ..
من الواضح ان لعنة الجد مستمره
وأنه يحاول التواصل مع أفراد أسرته
او ربما يحاول العوده !!!!!!!!!!:
القصه يرويها : خالد متولي .
